Diambik ari Berita Iban (Utusan Borneo) kena 25hb Mei 2010

RM39.6 bilion projek jalai alun dalam RMK-10: Manyin

May 25, 2010, Tuesday

249 projek di baruh Perintah Besai lalu 358 iti ari perintah menua udah langgur

KUCHING: Menteri Pemansang Infrastruktur enggau Penyambung Dato Sri Michael Manyin Jawong madahka Sarawak udah ngelanggur 607 projek jalai alun ti beungkus RM39.36 bilion dalam Atur Pemansang Malaysia Lumpar Kesepuluh (RMK-10).Ku iya, 249 projek nya ti beungkus RM21.17 dilanggurka ba baruh Program Pemansang Jalai Alun Perintah Besai lalu 358 iti ti beungkus RM18.19 bilion dilanggur ba baruh program perintah menua dalam timpuh lima taun nya ila.

“Sarawak udah ngelanggur 607 projek jalai alun ti beungkus RM39.36 bilion nagmbika diperunding dalam RMK-10.

“249 projek nya dilanggur di baruh program pemansang jalai alun perintah besai sereta 358 di baruh program printah menua,” Manyin.

Ku iya, semua langgur tu udah dikenataika ngagai perintah besai enggau perintah menua ngambika tau dikemandarka.

Manyin mansutka jaku tu lebuh ti nyimpul jurai ngarika Opis Menteri iya ba Aum Kunsil Nengeri ditu kemari.

Manyin lebuh ti ngenang pemansang progam jalai alun ba RMK-9 tu tadi, dia iya ba jaku simpul nya madahka perintah menua tu udah mujur ngagai 81 persin ari projek jalai ti diungkup ba sepemanjai timpuh nya.

Ku iya, lalu projek ke lebih agi benung dipejalai lalu disadang tembu lebuh abis timpuh pemansang Malaysia kediatu ba ujung tauan tu.

Ba timpuh RMK-9 dia menua tu bisi diungkup RM2.26 bilion ti dikemendar kena ngaga 69 projek jalai alun.

Ari penyampau nya dia 45 projek udah tembu lalu ke lebih agi benung digaga, ku iya.

Manyin lebuh ti ngenangka projek jalai di baruh ungkup belanja tambah RM1.0 bilion ari perintah besai madahka naka kediatu dia bisi 30 batang jalai bukai digaga ngena belanja RM505.05 milion.

Ari penyampau nya dia tiga iti projek udah tembu lalu 20 benung digaga sereta lapan ke bukai agi dipanggur.